Manchouria Diavaez

Manchouria Diavaez (sinaeg : 外 满洲 wài mǎn zhōu), anvet ivez Biz Diavaez [Sinaat] e Sina (sinaeg: 外 东北 wài dōng běi), ha Priamurye e Rusia (Приамурье el lizherenneg kirillek), zo un douar roet gant Sina da Rusia dre Feur-emglev Aigun e 1858 ha dre Feur-emglev Beijing e 1860. Bremañ ez a d'ober rannvroioù rusian Krai an Arvor, un tamm eus Krai Khabarovsk, an Oblast Emren Yuzev hag Oblast Amour. Evit tud zo e ranker kontañ enez Sac'halin e-barzh ouzhpenn.

Ul lodenn all eus Manchouria, "Manchouria Diabarzh", zo e Republik Pobl Sina hag a ya d'ober rannvro Biz Sina.

Breud a oa bet war perc'henniezh al lodenn hanternoz eus ar rannvro-se etre 1643 ha 1689. Da-heul Feur-emglev Nerchinsk e 1689, an harzoù etre Sina ha Rusia a voe lakaet e Menezioù Stanovoy ha war ar stêr Argoun, ar pezh a lakae Manchouria Diavaez da vezañ e-barzh impalaeriezh Sina. Goude Brezel an Opiom e voe meur a feur-emglev a redias an tiegezh Qing da lezel douaroù ha porzhioù da vont gant broioù Europa, Rusia ha Japan. An harzoù etre Rusia ha Sina a voe adtreset gant Feur-emglev Aigun e 1858 ha Feur-emglev Beijing e 1860, ha diwar neuze ez ae ar stêrioù Amour hag Oussouri da verkañ ar vevenn etrezo. Douaroù Manchouria Diavaez a voe kollet gant Sina neuze, koulz hag an digor war Mor Japan.